Орон нутгийн иргэдэд үзүүлэх мэс заслын тусламж үйлчилгээнд анагаах ухааны дэвшилтэт тоехнологи дурангийн мэс заслыг суурьшуулж, улсын төсвийн 296 сая төгрөгийн хөрөнгө оруулалтаар хэвлийн хөндийн мэс заслын багаж, тоног төхөөрөмжийг АНЭ-т хүлээлгэн өглөө. Улмаар анхны хагалгааг УИХ-ын гишүүн, хүний гавьяат эмч Ж.Чинбүрэнгээр ахлуулсан баг АНЭ-ийн эмч, ажилтнуудтай хамтран хийв.
АНЭ-ийн мэс заслын тасаг жилд 1000 гаруй иргэнд эмчилгээ,үйлчилгээг үзүүлдэг бөгөөд жилд 200 орчим цөсний хагалгаа орохоос 50-60 нь өөрийн хүсэлтээр дурангийн хагалгаа хийлгэхээр Улаанбаатар хотыг зорьдог байжээ. Харин дээрх хагалгааг ийнхүү орон нутагтаа хийдэг болсноор энэ урсгалыг зогсоож, иргэдийн хөрөнгө мөнгө, цаг хугацааг хэмнэх боломж бүрдэж буй юм.
Тоног төхөөрөмжийг хүлээлгэн өгөх ёлолын ажиллагаанд УИХ-ын гишүүн, хүний гавьяат эмч Ж.Чинбүрэн, Монгол Улсын төрийн шагналт, хүний гавьяат эмч О.Сэргэлэн, С.Эрдэнэ, Төрийн шагнат, Анагаах ухааны доктор профессор Мэдээгүйжүүлэг эрчимт эмчилгээний нийгэмлэгийн тэргүүн н.Ганболд, аймгийн ЗДТГ-ын дарга П.Мөнхжаргал, ЭМГ-ын дарга П.Болормаа, АНЭ-ийн дарга Д.Мөнхзул болон салбарын ажилтнууд оролцсон юм.
Эрүүл мэндийн дэвшилтэт, шинэ технологийг Сүхбаатар аймагтаа нэвтрүүлэх ажил биелэлээ олж байгаад туйлын баяртай байна. Дурангийн мэс заслыг нэвтрүүлж чадаагүй хоёрхон аймаг үлдээд байсан. Хэдийгээр бусад аймгуудаас хожуу нэвтрүүлж байгаа ч энэ ажлыг эхлүүлнэ гэдэг өөрөө маш том амжилт. Иргэдэд үзүүлэх мэс заслын эмчилгээг ямар нэг өвдөлт, шаналалгүй үзүүлж хурдан тэнхрэх, цаашлаад эмнэлгийн ор хоногийн тоог цөөлөх зорилтын хүрээнд эдгээр тоног төхөөрөмжийнхөө ач холбогдлыг гаргаж, үр дүнтэй ажиллах хэрэгтэй гэдгийг УИХ-ын гишүүн, хүний гавьяат эмч Ж.Чинбүрэн нээлтийн үгэндээ хэлсэн юм.
Сүхбаатар аймаг улс болон орон нутгийн төсвийн хөрөнгө оруулалтыг эрүүл мэндийн салбартаа оновчтой зарцуулж, эмнэлгийн тусламж үйлчилгээг сайжруулахад онцгойлон анхаарч ажилладаг. Үүнд Сүхбаатар аймгаас сонгогдсон УИХ-ын хоёр гишүүн болоод энэ нутгаас гаралтай олон гишүүдийн дэмжлэг, идэвх санаачилга их бий. Үүний нэгээхэн жишээ бол энэхүү дурангийн мэс заслын тоног төхөөрөмжийг олгож буй явдал юм. Энэ бол бид бүхний олон жилийн хүсэл байсан. Өнөөдөр ийнхүү ажил хэрэг болж байгаад таатай байна. Аймаг орон нутгийн маань хүн ам өсөж байна. Тиймээс эрүүл мэндийн салбарт анхаарлаа хандуулах нь зүйн хэрэг. Ирэх жилүүдэд улсын төсийн хөрөнгө оруулалтаар Баяндэлгэр, Баруун-Урт сумдад шинээр ЭМТ барьж ашиглалтад оруулна. Мөн хэдхэн хоногийн өмнө аймгийн ИТХ-ын хурлаар эрүүл мэндийн салбарын тулгамдсан асуудлыг шийдвэрлэсэн нь 1992 онд ашиглалт орж, өдгөө багтаамж, өрөө тасалгаа хүрэлцэхгүй болсон, барилгын чанар муудсан зэргээс шалтгаалан энэ жилийн төсөвт АНЭ-ийн шинэ барилгын зураг төсвийг хийлгэж, газрыг нь төлөвлөх ажлыг эхлүүлээд байна. Цаашлаад холбогдох хүмүүстэйгээ хамтран эмнэлгийн шинэ барилгатай болохоор зорин ажиллаж байна гэдгийг аймгийн ЗДТГ-ын дарга П.Мөнхжаргал онцлов.
