30 дахь удаагийн логик паззлын Дэлхийн аварга шалгаруулах тэмцээнд Сүхбаатар аймгаас бүтэн баг оролцохоор боллоо.
Тодруулбал тус тэмцээнд Монгол Улсаас оролцох А, В, С багуудын оролцогчдын нэрс зарлагдсан бөгөөд үүнд Сүхбаатар аймгаас А багт А.Оюун-Эрдэнэ, З.Хишигдалай, Б.Золбар, Б.Жаргалхүү С багт Д.Доржханд нар сонгогджээ. Тэмцээн 2023 оны 10 дугаар сарын 19-нөөс 21-ний өдрүүдэд Канад улсын Торонто хотод зохион байгуулагдана.
5 дугаар сарын 6, 7-ны өдрүүдэд Улаанбаатар хотноо Олон улсын логик, паззлын уралдааны II шатыг зохион байгуулжээ. Энэхүү шатанд 21 аймаг, нийслэл хотоос шалгарсан шилдэг 182 оролцогч хоёр өдрийн турш нийт 4 цаг 30 минутын бодолт хийж 15 төрлийн 36 паззл бодож өрсөлдөж, ангилал тус бүрийн шилдэг 9 оролцогчдыг шалгаруулжээ. Өөрөөр хэлбэл тус тэмцээнээс Монгол Улсаас ДАШТ-д оролцох баг тамирчдыг шалгаруулсан байна.
Өнгөрсөн жилийн ДАШТ-д тус аймгаас сонгогдсон багш, тамирчид мөн Монгол Улсаа төлөөлөн амжилттай оролцож байсан бөгөөд А.Оюун-Эрдэнэ шилдэг наймд шалгарч байсан юм.
